7 கடல் மைல் நீந்திச் சென்று தமிழகத்தில் தஞ்சம் கோரிய இளைஞர்!

கடலில் நீந்திக் கரைநேர்ந்த மன்னாரைச் சேர்ந்த இளைஞர் ஒருவரை தமிழகக் கடலோரக் காவல் படையினர் கைது செய்துள்ளனர்.

பொருளாதார நெருக்கடி காரணமாக மன்னாரைச் சேர்ந்த 6 பேர் அண்மையில் படகு மூலம் தமிழகத்துக்குத் தப்பிச் செல்ல முயன்றுள்ளனர்.

இவர்கள் படகில் சென்று கொண்டிருந்தபோது நடுக்கடலில் துப்பாக்கிச் சூட்டுச் சத்தம் கேட்டுள்ளது. சிறிலங்கா கடற்படையினர் என்ற அச்சத்தில் ஹசன் கான் என்ற இளைஞர் கடலில் பாய்ந்துள்ளார்.

ஏனையவர்கள் படகு மூலம் தமிழகத்தை அடைந்தபோதும், ஹசன் கான் கரை சேரவில்லை. இந்தநிலையில் இவர் சுமார் 7 கடல் மைல் தூரம் நீந்திச் சென்று தமிழகக் கரையை அடைந்துள்ளார்.

அவரைக் கைது செய்துள்ள தமிழக கடலோரக் காவல் படையினர், அவரது அடையாளத்தை உறுதிப்படுத்தும் நடவடிக்கைகளை முன்னெடுத்துள்ளனர் என்று தெரிவிக்கப்படுகின்றது.