பளை விபத்தில் இளைஞர் சாவு!- தந்தை சிகிச்சையில்!!

பளை, இயக்கச்சிப் பகுதியில் நேற்று நடந்த விபத்தில் 25 வயது இளைஞர் ஒருவர் உயிரிழந்துள்ளார். அவரது தந்தை காயங்களுக்குள்ளாகி மருத்துவமனையில் சேர்க்கப்பட்டுள்ளார்.

பளை, இந்திராபுரத்தைச் சேர்ந்த ஜோன்சன் நிலோசன் (வயது-25) என்ற இளைஞரே உயிரிழந்துள்ளார். இவர் ஒரு மாற்றுத் திறனாளி என்று தெரிவிக்கப்பட்டது.

கிளிநொச்சி, இரணைமடுவில் உள்ள வீட்டுக்குச் சென்றுவிட்டு, நேற்றுக்காலை தந்தையுடன் இந்திராபுரத்துக்கு மோட்டார் சைக்கிளில் திரும்பியபோது மோட்டார்சைக்கிள் வாகனம் ஒன்றுடன் மோதி விபத்து நடந்துள்ளது.

விபத்தில் உயிரிழந்த இளைஞரின் உடல் கிளிநொச்சி மருத்துவமனையில் ஒப்படைக்கப்பட்டுள்ளது. அவரது தந்தையான 55 வயதுடைய சொலமன் ஜோன்சன் விபத்தில் காயமடைந்த நிலையில், கிளிநொச்சி மருத்துவமனையில் சிகிச்சைக்காகச் சேர்க்கப்பட்டுள்ளார்.

இந்த விபத்துத் தொடர்பில் கிளிநொச்சிப் பொலிஸார் விசாரணைகளை முன்னெடுத்துள்ளனர்.