சந்தேகநபர் ஒருவரைத் தேடிச் சென்ற சுன்னாகம் பொலிஸ் உத்தியோகத்தர்கள் இருவர் மீது நேற்றுத் தாக்குதல் நடத்தப்பட்டுள்ளது என்று தெரிவிக்கப்படுகின்றது. இந்தச் சம்பவம் தொடர்பாக கோப்பாய் பொலிஸார் 5 பேரைக் கைது செய்துள்ளனர்.
திருட்டுத் தொடர்பாகத் தேடப்பட்டு வந்த ஒருவரைக் கைது செய்ய கோப்பாய் யோகபுரம் பகுதிக்குச் சென்றபோதே பொலிஸ் உத்தியோகத்தர்கள் மீது தாக்குதல் நடத்தப்பட்டுள்ளது என்று தெரியவருகின்றது.
சந்தேகநபரை அழைத்துச் செல்ல பொலிஸார் முயன்றபோது அங்கிருந்தவர்கள் பொலிஸ் உத்தியோகத்தர்களுடன் முரண்பட்டதுடன், பொலிஸாருடன் தள்ளுமுள்ளில் ஈடுபட்டுள்ளனர். அதையடுத்து பொலிஸ் உத்தியோகத்தர்கள் சந்தேகநபரைக் கைது செய்யாது அந்த இடத்தில் இருந்து அகன்றுள்ளனர்.
சம்பவம் நடைபெற்ற இடம் கோப்பாய் பொலிஸ் பிரிவுக்கு உட்பட்ட பகுதி என்பதால், பொலிஸாரின் கடமைக்கு இடையூறு ஏற்படுத்திய குற்றச்சாட்டில் 5 பேர் கோப்பாய் பொலிஸாரால் நேற்றுமாலை கைது செய்யப்பட்டனர். இன்னும் பலர் தேடப்பட்டு வருகின்றனர் என்று பொலிஸார் தெரிவித்தனர்.
Discussion about this post