நாய்குட்டியின் நகக்கீறல் குடும்பஸ்தர் உயிரை பறித்தது!!- யாழில் சம்பவம்!!

3 மாதம் நிரம்பிய நாய்க் குட்டியின் நகக்கீறலைக் கவனிக்காமலிருந்தமையால் ஒருவர் உயிரிழந்துள்ளார்.

தம்பித்துரை வீதி பண்டத்தரிப்பைச் சேர்ந்த 48 வயதுடைய காருண்யசிவம் ஆனந்தராசா என்பவரே நேற்று மதியம் உயிரிழந்துள்ளார்.

கடந்த ஜனவரி மாதத்தின் இறுதிப் பகுதியில் வீட்டில் வளர்த்த 3 மாத நாய்க்குட்டி ஒன்று, ஆனந்தராசாவின் கையில் விறாண்டியுள்ளது.

இதன் பின்னர் 2 நாள்களில் நாய்க் குட்டி உயிரிழந்துள்ளது. நாய்க்குட்டியின் நகக்கீறலுக்கு ஆனந்தராசா மருத்துவ சிகிச்சை பெறவில்லை.

இந்த நிலையில் ஆனந்தராசாவுக்கு நேற்றுத் திடீரென உடல் நலக்குறைவு ஏற்பட்டுள்ளது. நீர்வெறுப்பு நோய்க்குரிய அறிகுறிகள் அவரில் தென்பட்டுள்ளன.

நேற்றுக் காலை சங்கானை மருத்துவமனைக்கு கொண்டு செல்லப்பட்டு உடனேயே அவர் அங்கிருந்து யாழ்ப்பாணம் போதனா மருத்துவமனையில் சிகிச்சைக்குச் சேர்க்கப்பட்டுள்ளார். எனினும் நேற்று மதியம் அவர் உயிரிழந்துள்ளார்.

செல்லப்பிராணிகளால் சிறிய காயங்கள் ஏற்படுத்தப்பட்டாலும் உடனடியாக மருத்துவ சிகிச்சையைப் பெறுவதன் மூலம் உயிரிழப்புக்களைத் தவிர்த்துக் கொள்ள முடியும் என்று மருத்துவர்கள் தெரிவித்துள்ளனர்.