கிளிநொச்சி, புளியம்பொக்கணையில் வீட்டிலிருந்த தம்பதியரைக் கொடூரமாகத் தாக்கி கொள்ளையிட முயன்றோர்,அயலவர்கள் கூடியதால் அங்கிருந்து தப்பியோடியுள்ளனர். இந்தச் சம்பவம் நேற்று முன் தினம் நள்ளிரவு நடந்துள்ளது.
குறித்த வீட்டுக்குள் புகுந்த மூவர் வீட்டில் இருந்த கணவனையும், மனைவியையும் கத்தி மற்றும் உலக்கையால் தாக்கியுள்ளனர்.
கணவனின் கையில் வெட்டிக் காயப்படுத்தியதுடன், மனைவியை உலக்கையால் தாக்கிக் கொள்ளையிட முயன்றுள்ளனர்.
வீட்டில் இருந்த சிறுவர்கள் பெருங்குரலில் அழுததால் சந்தேகமடைந்த அயலவர்கள், ஒன்றுகூடியதையடுத்து கொள்ளையர்கள் மூவரும் அங்கிருந்து தப்பியோடியுள்ளனர்.
வீட்டுக்குள் இரத்த வெள்ளத்தில் வீழ்ந்து கிடந்த கணவனையும், கொள்ளையர்களின் தாக்குதலால் பாதிப்படைந்த மனைவியையும் அயலவர்கள் மீட்டு கிளிநொச்சி மருத்துவமனையில் சேர்ப்பித்தனர்.
தம்பதியர் தற்போது மருத்துவமனையில் சிகிச்சைக்குட்படுத்தப்பட்டிருப்பதால், வீட்டில் நகைகள், பணம் கொள்ளையிடப்பட்டதா என்பதைச் சரியாகக் கூறமுடியில்லை என்று தெரிவித்த பொலிஸார், இந்தச் சம்பவம் தொடர்பாக விசாரணைகள் முன்னெடுக்கப்பட்டு வருகின்றன என்று தெரிவித்தனர்.
Discussion about this post