நல்லூர், கல்வியங்காட்டில் இருவர் மீது வாள்வெட்டுத் தாக்குதல் நடத்தப்பட்டுள்ளது. அதில் இருவரும் படுகாயமடைந்துள்ள நிலையில் மருத்துவமனையில் சேர்க்கப்பட்டுள்ளனர்.
இந்தச் சம்பவம் நேற்று இரவு 6.40 மணியளவில் நடந்துள்ளது. நல்லூர் சட்டநாதர் ஆலயத்துக்கு அருகில் உள்ள வீடொன்றுக்கு முன்பாக மோட்டார் சைக்கிளுடன் வீதியில் நின்று உரையாடிக் கொண்டிருந்த இருவர் மீதே தாக்குதல் நடத்தப்பட்டுள்ளது.
3 மோட்டார் சைக்கிள்களில் வந்த 6 பேர் கொண்ட கும்பல் தாக்குதல் நடத்தி விட்டுத் தப்பிச் சென்றுள்ளமை ஆரம்ப விசாரணைகளில் தெரியவந்துள்ளது என்று பொலிஸார் தெரிவித்தனர். கும்பலின் தாக்குதலில் மோட்டார் சைக்கிளும் சேதடைந்துள்ளது.
47 வயதுடைய இருவரே தாக்குதலில் படுகாயமடைந்துள்ளனர். படுகாயமடைந்த இருவரும் மருத்துவமனையில் சேர்க்கப்பட்டுள்ளனர்.
அதேவேளை, கல்வியங்காடு செங்குந்தா மைதானம் தொடர்பான பிணக்கே தாக்குதலின் பின்னணியாக இருக்கலாம் என்று தாக்குதலுக்கு இலக்கானவர்களின் தரப்பினர் தெரிவித்தனர்.
இந்தச் சம்பவம் தொடர்பாக உடனடியாக கோப்பாய் பொலிஸாருக்குத் தகவல் வழங்கப்பட்டபோதும், அவர்கள் சிலமணிநேரத்தின் பின்னரே சம்பவ இடத்துக்கு வந்தார்கள் என்று அந்தப் பகுதியில் நின்றவர்கள் குற்றஞ்சாட்டியுள்ளனர்.
Discussion about this post