நாட்டின் கடனை மறுசீரமைக்கும் வேலைத்திட்டம் காலதாமதமின்றி நடைமுறைப்படுத்தப்பட வேண்டும் என்று கொழும்பு பல்கலைக்கழகத்தின் பொருளாதாரப் பிரிவின் சிரேஷ்ட விரிவுரையாளர் கலாநிதி பிரியங்க துனுசிங்க தெரிவித்துள்ளார்.
உலகில் ஏனைய 54 நாடுகள் கடன் நெருக்கடிகளை எதிர்நோக்கி வருகின்றன என்று ஐக்கிய நாடுகளின் அபிவிருத்தித் திட்டம் அறிவித்துள்ளது.
உலகளாவிய கடன் நெருக்கடி ஏற்படுவதற்கு முன்னர் கடன் மறுசீரமைப்பு வேலைத் திட்டத்தை நிறைவு செய்வது இலங்கைக்கு நன்மை பயக்கும்.
சர்வதேச நாணய நிதியத்தின் கடன் மேலும் தாமதமானால் இலங்கையில் வருமானம் குறைந்த மக்கள் பெரும் நெருக்கடிக்குள்ளாகும் ஆபத்து ஏற்பட்டுள்ளது.
கடன் வழங்கும் நாடுகளின் நம்பிக்கையை பெற வேண்டிய நடவடிக்கை தாமதமின்றி உடனடியாக இலங்கை மேற்கொள்ள வேண்டும். இல்லை என்றால் நாடு சந்திக்க போகும் நெருக்கடி மிகவும் பாரதூரமானதாக இருக்கும்.- என்றார்.
அதேவேளை, பேராதனை பல்கலைக்கழகத்தின் பொருளாதாரம் மற்றும் புள்ளிவிபரவியல் திணைக்களத்தின் பேராசிரியர் வசந்த அத்துகோரள இது தொடர்பில் தெரிவித்துள்ளதாவது, 22 கடன் வழங்கும் நாடுகளை உள்ளடக்கிய பரிஸ் கிளப், கடன் நெருக்கடிக்கு விரைவான தீர்வு காணும் இலங்கையின் முயற்சிகளுக்கு அதிகபட்ச ஆதரவு வழங்கப்படும் என்று அறிவித்துள்ளது. ஆயினும் கடன் மறுசீரமைப்பு வேலைத்திட்டத்துக்கு ஏனைய நாடுகளும் உடன்பட வேண்டும்.
பரிஸ் கிளப்புக்குள் இலங்கைக்கு அதிக கடன் வழங்கும் நாடுகளுக்கு இந்திய மற்றும் சீனா போன்ற நாடுகள் உள்ளடங்கவில்லை.
அவ்வாறான நாடுகளின் அனுமதி பெறுவது கட்டாயமாகும். இல்லை என்றால் நாடு மிகவும் ஆபத்தான நிலைக்குள்ளாகும் என்றார்.
Discussion about this post