யாழ்ப்பாணம், மணியந்தோட்டத்தைச் சேர்ந்த பெண் ஒருவர் கடந்த முதலாம் திகதி முதல் காணாமல் போயிருந்த நிலையில், அவர் கொலை செய்யப்பட்டு புதைக்கப்பட்டிக்கலாம் என்று சந்தேகிக்கப்படுகின்றது.
மணியந்தோட்டம் உதயநகரைச் சேர்ந்த 30 வயதுடைய பெண்ணே காணாமல் போயிருந்தார். இவர் கொலை செய்யப்பட்டு, பிறிதொரு வீட்டின் வளாகத்தில் புதைக்கப்பட்டிருக்கலாம் என்று ஆரம்ப விசாரணைகளின் அடிப்படையில் பொலிஸார் தெரிவித்தனர்.
இந்தப் பெண் கொடுத்த கடனை மீளக் கேட்கச் சென்றபோது, அந்த வீட்டில் இருந்தவர்கள் பெண்ணை அடித்துக் கொலை செய்து புதைத்திருக்கலாம் என்று சந்தேகிக்கப்படுகின்றது.
பெண் காணாமல் போயிருந்தமை தொடர்பாக பொலிஸில் முறைப்பாடு செய்யப்பட்டிருந்த நிலையில், விசாரணைகளை மேற்கொண்ட பொலிஸார், அந்தப் பெண் கடைசியாகச் சென்ற வீட்டிலும் விசாரணைகளை மேற்கொண்டனர்.
சந்தேகத்தின் அடிப்படையில் சோதனை மேற்கொள்ளப்பட்டபோது, அந்த வீட்டு வளாகத்தில் பெண் புதைக்கப்பட்டமைக்கான தடயங்களைப் பொலிஸார் சேகரித்துள்ளனர்.
பெண்ணின் மோட்டார் சைக்கிளும் அந்த வளாகத்திலேயே புதைக்கப்பட்டுள்ளதாக சந்தேகிக்கப்படுகின்றது.
இந்தச் சம்பவம் தொடர்பாக மூவர் கைது செய்யப்பட்டுள்ளனர் என்றும், அவர்களில் இருவர் கணவன், மனைவி என்றும் பொலிஸார் தெரிவித்தனர்.
கைதான கணவனும், மனைவியும், சடலம் புதைக்கப்பட்டுள்ளது என்று சந்தேகிக்கப்படும் வீட்டைச் சேர்ந்தவர்களாவர்.
Discussion about this post