ஆசிரியர்களுக்கான இடமாற்றங்கள் உரிய முறையில் நடைமுறைப்படுத்தப்பட வேண்டும். இல்லையெனில் மீண்டும் தொழிற்சங்க போராட்டத்தை நடத்த வேண்டி ஏற்படும் என்று இலங்கை ஆசிரியர் சங்கத்தின் உபதலைவர் தீபன் திலீசன் தெரிவித்தார்.
யாழ்.ஊடக அமையத்தில் நேற்று நடத்திய ஊடக சந்திப்பில் கருத்துத் தெரிவித்தபோதே அவர் இவ்வாறு தெரிவித்துள்ளார்.
இடமாற்றம் தொடர்பாக தொழிற்சங்க சபையால் எடுக்கப்படும் தீர்மானங்களை ஏற்றுக்கொள்ளாது, வடமாகாண கல்விப்பணிப்பாளர் தன்னிச்சையாகச் செயற்பட்டு வருகின்றார். அதனால் கல்வித்துறையில் மிக நெருக்கடியான சூழ்நிலை உருவாகி இருக்கின்றது.
எதிர்வரும் ஏப்ரல் மாத தொடக்கத்தில் இந்த இடமாற்றங்கள் அதாவது வெளிமாவட்ட ஆசிரியர்களின் சேவையின் அடிப்படையில் இடமாற்றம் பூர்த்தி செய்யப்பட வேண்டும். இல்லையென்றால் கல்வி அமைச்சின் அலுவலகத்தையும், ஆளுநர் செயலகத்தையும் முடக்குவோம்.
அரசியல் செல்வாக்கு காரணமாக சில ஆசிரியர்கள் இந்த இடமாற்றத்துக்கு உள்வாங்கப்படவில்லை. அவர்களுக்கு வசதியான இடத்தில் நியமனங்களைப் பெற்று நீண்ட காலமாக உரிய இடமாற்றம் இல்லாமல் அதே பாடசாலையில் சேவை செய்து வருகின்றனர். இது தவறு. இடமாற்ற கொள்கை முறையாக நடைமுறைப்படுத்தப்பட வேண்டும்.
வடக்கு கல்வி அமைச்சில் அரசியல் மற்றும் அதிகார துஷ்பிரயோகங்கள் நடந்துள்ள போதும், தற்போதைய ஆளுநரும் அவை தொடர்பில் நடவடிக்கை எடுக்காதிருக்கிறார். இது ஆளுநரும் அரசியல் நிகழ்ச்சி நிரலிலேயே இயங்குகின்றாரா என்ற சந்கேகத்தை ஏற்படுத்துகின்றது என்றார்.
Discussion about this post