ஜி.எல்.பீரிஸ் உடனான சந்திப்பை புறக்கணித்தார் கொழும்பு பேராயர்.

சில நிபந்தனைகள் நிறைவேற்றப்படும் வரை வெளிவிவகார அமைச்சர் பேராசிரியர்
ஜி.எல்.பீரிஸ் உடனான சந்திப்பை புறக்கணிப்பதாக கொழும்பு பேராயர்
கர்தினால் மெல்கம் ரஞ்சித் ஆண்டகை தெரிவித்துள்ளார்.

சந்திப்பொன்றிற்கு கோரிக்கை விடுத்து வெளிவிவகார அமைச்சர் ஜி.எல்.பீரிஸ்
கடிதமொன்றை அவருக்கு அனுப்பியிருந்ததாக அருட்தந்தை சிரில் காமினி
பெர்னாண்டோ தெரிவித்துள்ளார்.

சில நிபந்தனைகள் பூர்த்தி செய்யப்பட்டால் சந்திப்பிற்கு தயாராக
இருப்பதாகவும் நிபந்தனைகள் நிறைவேறும் வரை அமைச்சரை சந்திக்க மாட்டோம்
என்றும் கர்தினால் பதிலளித்துள்ளதாக அருட்தந்தை சிரில் காமினி பெர்னாண்டோ
கூறினார்.

இந்நிலையில் ஈஸ்டர் ஞாயிறு தாக்குதல் தொடர்பான விசாரணைகள் பொதுமக்களின்
நம்பிக்கையைப் பெறும் வகையில் நடத்தப்பட வேண்டும் என கர்தினால் மெல்கம்
ரஞ்சித் ஆண்டகை ஜி.எல்.பீரிஸிற்கு அறிவித்துள்ளார்.

அத்தோடு கத்தோலிக்க சமூகம் மற்றும் பொது மக்களின் நம்பிக்கையைப் பெற,
ஈஸ்டர் ஞாயிறு தாக்குதல் தொடர்பான ஜனாதிபதி விசாரணை ஆணைக்குழுவின் இறுதி
அறிக்கையில் உள்ள பரிந்துரைகளை அரசாங்கம் அமுல்படுத்த வேண்டும் என்றும்
கூறியுள்ளார்.

மேலும் ஈஸ்டர் தாக்குதல் தொடர்பாக பொலிஸ் உயர்மட்ட அதிகாரிகள் உட்பட பலர்
ஊடகங்களில் அண்மையில் வெளியிடப்பட்ட கருத்துக்கள் தாக்குதல்கள் மீதான
விசாரணையில் நம்பிக்கையை வெளிப்படுத்தவில்லை என்றும் கர்தினால் மெல்கம்
ரஞ்சித் ஆண்டகை சுட்டிக்காட்டியுள்ளார்.