அத்துமீறி நுழைந்த திருடர்கள்… ரயில்வே ஊழியர்களுக்கு நேர்ந்த அதிர்ச்சி சம்பவம்!

இரத்மலானை ரயில் நிலையத்திற்குள் அத்துமீறி நுழைந்த திருடர்களின் கத்திகுத்து தாக்குதலில் ரயில்வே பாதுகாப்பு பிரிவின் உப பரிசோதகர் காயமடைந்துள்ளதாக கல்கிஸ்ஸை பொலிஸார் தெரிவித்தனர்.இச்சம்பவம் தொடர்பில் மேலும் தெரியவருவதாவது,

இரத்மலானை ரயில் நிலையத்திற்குள் அத்துமீறி நுழைந்த திருடர்கள் இருவர் ரயில் பெட்டிகளின் உதிரிபாகங்களை திருடிச் செல்ல முயற்சித்தபோது அதனை கண்ட ரயில்வே பாதுகாப்பு பிரிவின் உப பரிசோதகர் ஒருவர் திருடர்களை பிடிக்க முயன்றுள்ளார்.

இதன்போது, ரயில்வே பாதுகாப்பு பிரிவின் உப பரிசோதகர் ஒருவர் திருடனின் கால்களை இறுக்கமாக பிடித்து கொண்டுள்ளார்.

பின்னர், குறித்த திருடர்கள் இருவரும் ரயில்வே ஊழியரை கத்தியால் குத்தி காயப்படுத்தி அங்கிருந்து தப்பிச் செல்ல முயன்ற போது ரயில்வே பாதுகாப்பு பிரிவினரால் கைது செய்யப்பட்டு கல்கிஸ்ஸை பொலிஸ் நிலையத்தில் ஒப்படைக்கப்பட்டுள்ளார்.

இதனையடுத்து, காயமடைந்த ரயில்வே ஊழியர் சிகிச்சைக்காக கொழும்பு தெற்கு போதனா வைத்தியசாலையில் அனுமதிக்கப்பட்டுள்ளார்.