அமெரிக்க டொலரை அள்ளிக் கொடுக்கப் பல அரபு நாடுகள் தயாராகவே இருக்கின்றன. ஆனால் எமது நாட்டில் உள்ள தலைமைத்துவங்களுக்கு உதவி செய்ய அவர்கள் தயாராக இல்லை. ஒருவருடைய பதவியை விடவும் நாட்டில் வாழும் இரண்டு கோடி மக்களின் வாழ்வு, எதிர்காலம் என்பவையே முக்கியம்.
இவ்வாறு கிழக்கு மாகாண முன்னாள் ஆளுநர் எம்.எல்.எம்.ஏ. ஹிஸ்புல்லாஹ் தெரிவித்தார்.
காத்தான்குடியில் கடந்த ஞாயிற்றுக்கிழமை நடந்த நிகழ்வொன்றில் கருத்துத் தெரிவித்தபோதே அவர் இவ்வாறு தெரிவித்தார்.
அவர் மேலும் தெரிவித்துள்ளதாவது, கடனுக்கு மேல் கடன் – கடனுக்கு வட்டி வேறு. இந்திய அரசு பெற்றோலை ரஷ்யாவிடமிருந்து கொள்வனவு செய்து 40 வீத இலாபத்தை வைத்து நமது நாட்டுக்கு தருகிறார்கள்.
உதாரணமாக 500 மில்லியன் டொலரைத் தந்துவிட்டு ஆயிரம் தொடக்கம் 2 ஆயிரம் மில்லியன் டொலர் பெறுமதியான இலங்கையின் சொத்தை எழுதி வாங்கிக்கொள்கிறார்கள்.
இந்த அரசாங்கம் ஆட்சியிலிருக்கும் ஒவ்வொரு நாளும் எமது நாடு பயங்கரமான சூழ்நிலைக்கு தள்ளப்பட்டுக்கொண்டிருக்கிறது.
இப்போது நாங்கள் அனுபவித்துக்கொண்டிருப்பதல்ல கஷ்டம். இனித்தான் நாம் அதிக கஷ்டங்களை அனுபவிக்க போகின்றோம். இன்னும் இரண்டு, மூன்று மாதங்களுக்கு இந்த அரசாங்கம் தொடர்ந்தால் விளைவு மிகமோசமாக இருக்கும்.
இந்த அரசாங்கம் நாட்டின் நிலையை கருத்தில் கொண்டு உடனடியாக பதவிகளில் இருந்து விலகி, இந்த நாட்டை கட்டியெழுப்பும் திறமையானவர்களிடம் நாட்டை கையளித்துவிட்டு ஒதுங்க வேண்டும்.
சர்வதேச நாணய நிதியம் எமது நாட்டின் ஆட்சியாளர்கள் அதிகாரத்திலிருந்து ஒதுங்கும் வரை இலங்கைக்கு உதவ முன்வராது என்றார்.
Discussion about this post