சினிமாப்பாணியில் நடந்த நகைக் கடைக் கொள்ளை!- வெளிநாட்டவர் இருவருக்கு வலைவீச்சு!!

தென்னிலங்கையில் வெளிநாட்டவர்கள் இருவர், சினிமா பாணியில் மேற்கொண்ட பெரும் கொள்ளைச் சம்பவம் பரபரப்பை ஏற்படுத்தியுள்ளது.

காலி, களுவெல்ல பிரதேசத்தில் உள்ள நகைக்கடை ஒன்றுக்கு நகைகளைக் கொள்வனவு செய்வது போன்ற வெளிநாட்டு பிரஜைகள் இருவரே கொள்ளையில் ஈடுபட்டுள்ளனர்.

இவர்கள் இருவரும் சுமார் 7 மில்லியன் ரூபா பெறுமதியான 28 தங்க நகைகளை மோசடியான முறையில் கொள்ளையிட்டுள்ளனர் என்று காலி பொலிஸார் தெரிவித்தனர்.

வெளிநாட்டு பிரஜைகள் இருவரும் கடந்த 24ஆம் திகதி மதியம் முச்சக்கர வண்டியில் இரண்டு சிறிய பைகளுடன் நகைக்கடைக்கு வந்துள்ளனர்.

ஒரு பையில் தங்க நகைகளைப் போன்ற போலியான நகைகள் இருந்துள்ளன. மற்றொரு பை வெறுமையாக இருந்துள்ளது.

இருவரும் நகைக் கடையில் உள்ள மேசையில் இரு பைகளையும் வைத்துவிட்டு நகைக்கடை உரிமையாளரிடம் தங்க நகைகளின் விலைகளை விசாரித்துள்ளனர்.

நகைகளை பரிசோதித்துவிட்டு சிறிது நேரம் கழித்து 28 தங்க நெக்லஸ்களை வாங்கிக் கொள்கின்றோம் என்று நகைக் கடையின் உரிமையாளரிடம் வெளிநாட்டவர்கள் இருவரும் தெரிவித்துள்ளனர்.

கொள்வனவுக்குத் தெரிந்தெடுத்த 28 தங்க நெக்லஸ்களை அவர்கள் இருவரும் தமது வெற்று பையில் வைத்துள்ளனர்.
அப்போது, நகைகளின் கரட் அளவைச் சரிபார்க்க வேண்டும் என்று நகைக்கடை உரிமையாளர் கூறியுள்ளார்.

அதையடுத்து வெளிநாட்டுப் பிரஜைகள் இருவரும், பையை மேசை மீது வைத்து விட்டு கடைக்கு வெளியே சென்றுள்ளனர். பையைச் சோதனையிட்டபோது, அந்த நகைகள் போலியானவை என்று தெரியவந்துள்ளது.

வெளிநாட்டுப் பிரஜைகள் இருவரும் சாதுரியமாகப் பையை மாற்றி நகைகளைக் கொள்ளையிட்டுச் சென்றுள்ளனர்.

வெளிநாட்டு பிரஜைகள் இருவரில் ஒருவர் கடந்த சில நாள்களுக்கு முன்னர் டெங்குத் தொற்றால் பாதிக்கப்பட்டு தனியார் மருத்துவமனை ஒன்றில் சிகிச்சை பெற்றமை விசாரணைகளில் தெரியவந்துள்ளது.

சந்தேகநபர்கள் இருவரையும் கைது செய்வதற்கான நடவடிக்கைகள் ஆரம்பிக்கப்பட்டுள்ளன என்று பொலிஸார் தெரிவித்தனர்.