களுத்துறையிலிருந்து கொழும்புக்கு “ கோ ஹோம் கோத்தா” யாத்திரை!

ஜனாதிபதி கோத்தாபய ராஜபக்ச பதவி விலக வேண்டும் என வலியுறுத்தியும், மக்களின் தன்னெழுச்சி போராட்டத்துக்கு ஆதரவு தெரிவித்தும் தேசிய மக்கள் சக்தி பெருமெடுப்பில் பாத யாத்திரை ஒன்றை முன்னெடுக்கவுள்ளது.

எதிர்வரும் 17, 18 மற்றும் 19 ஆம் திகதிகளில் இந்தப் பாத யாத்திரை இடம்பெறும் எனவும், 17 ஆம் திகதி காலை 9 மணிக்கு, களுத்துறை – பேருவளை நகரில் யாத்திரை ஆரம்பமாகும் எனவும் தேசிய மக்கள் சக்தி தெரிவித்துள்ளது.

இது தொடர்பில் கருத்து வெளியிட்ட தேசிய மக்கள் சக்தியின் உறுப்பினர்கள் தெரிவித்தாவது, ஜனாதிபதி கோத்தாபய ராஜபக்ச பதவி விலக வேண்டும் என வலியுறுத்தி நாட்டு மக்கள் போராடிவருகின்றனர். மக்களின் போராட்டம் வெற்றியளிக்கும்.

அதற்கு அரசியல் ரீதியான ஆதரவை வெளிப்படுத்துவதற்கும், போராட்ட இலக்கை அடைவதற்கும் பாத யாத்திரையை 17 ஆம் திகதி ஆரம்பிக்கின்றோம்.

இது தேசிய மக்கள் சக்தியால் ஏற்பாடு செய்யப்பட்டாலும் மக்களுக்கான போராட்டம். இதில் அனைவரும் கட்சி பேதமின்றி பங்கேற்கவேண்டும். 19 ஆம் திகதி யாத்திரை கொழும்பை வந்தடையும் என்றனர்.