கொடுக்கல் வாங்கல் விவகாரத்தால் யாழில் கடத்தப்பட்ட தந்தையும், பிள்ளைகளும்!!

கொடுக்கல் வாங்கல் பிரச்சினையால் யாழ்ப்பாணத்தில் தந்தையும், இருபிள்ளைகளும் கடத்தப்பட்ட சம்பவம் பரபரப்பை ஏற்படுத்தியுள்ளது.

ஆனைக்கோட்டை மற்றும் சாவற்காடு பகுதிகளைச் சேர்ந்த இரு தரப்பிடையே கொடுக்கல் வாங்கல் பிரச்சினை இருந்தது என்றும், இது தொடர்பான வழக்கு மல்லாகம் நீதிமன்றத்தில் நடைபெற்று வருகின்றது என்றும் தெரிவிக்கப்படுகின்றது.

இந்த நிலையில் நேற்று தனது கணவரும், இரு பிள்ளைகளும் கடத்தப்பட்டனர் என்றும், பணத்தைக் கொடுத்தால் அவர்களை விடுவிக்க முடியும் என்று தொலைபேசி ஊடாக இனந்தெரியாதவர்கள் தெரிவித்தனர் என்று கடத்தப்பட்டவரின் மனைவி பொலிஸ் நிலையத்தில் முறைப்பாடு செய்துள்ளார்.

பொலிஸார் மேற்கொண்ட விசாரணைகளின் அடிப்படையில் தெல்லிப்பளையில் உள்ள வீடொன்றில் அடைத்து வைக்கப்பட்டிருந்த நிலையில் தந்தையும், இரு பிள்ளைகளும் மீட்கப்பட்டுள்ளனர்.

இந்தச் சம்பவம் தொடர்பாக மூவர் கைது செய்யப்பட்டுள்ளனர் என்றும், அவர்களிடம் விசாரணைகள் முன்னெடுக்கப்பட்டு வருகின்றனர் என்றும் பொலிஸார் தெரிவித்தனர்.

அதேவேளை கடத்தப்பட்டவரின் மனைவியை தொலைபேசியில் தொடர்புகொண்டு பேசிய நபர் தனியார் தொலைத் தொடர்பு சேவை ஒன்றின் பணியாளர் என்பது விசாரணைகளில் தெரியவந்துள்ளது என்றும் பொலிஸார் தெரிவித்தனர்.