வவுனியா, பூவரசங்குளம், குருக்கள்புதுக்குளத்தில் இன்று காலை நடந்த விபத்தில் 35 வயது தந்தையும், 17 வயது மகனும் உயிரிழந்துள்ளனர். தனியார் பயணிகள் பஸ்ஸூம், மோட்டார் சைக்கிளும் மோதி இந்த விபத்து நடந்துள்ளது.
மோட்டார் சைக்கிளில் பயணித்த தந்தையும், மகனும் உள்வீதியில் இருந்து பிரதான வீதிக்கு ஏறியபோது, பிரதான வீதியில் மன்னாரில் இருந்து வவுனியா நோக்கிப் பயணித்த தனியார் பயணிகள் பஸ் மோட்டார் சைக்கிளை மோதியது என்று தெரிவிக்கப்படுகின்றது.
மோட்டார் சைக்கிளில் பயணித்த ஒருவர் பஸ்ஸின் சில்லில் அகப்பட்டு சம்பவ இடத்திலேயே உயிரிழந்துள்ளார். மற்றையவர் படுகாயமடைந்த நிலையில் வவுனியா மருத்துவமனைக்குக் கொண்டு செல்லும் வழியில் உயிரிழந்துள்ளார்.
விபத்தை அடுத்து சம்பவ இடத்தில் கூடிய மக்கள் தனியார் பேருந்து பஸ் மீது தாக்குதல் நடநத்தியுள்ளனர். அதையடுத்து அந்தப் பகுதியில் பதற்றம் ஏற்பட்டது. பூவரசங்குளம் பொலிஸார் சம்பவ இடத்துக்கு வந்து நிலைமையைக் கட்டுப்படுத்தினர்.
இந்தச் சம்பவம் தொடர்பாக பூவரசங்குளம் பொலிஸார் விசாரணைகளை முன்னெடுத்துள்ளனர்.
Discussion about this post