பிள்ளைகளுக்கு உணவில்லாததால் தற்கொலை செய்த தந்தை!! – இலங்கையில் சோகம்!!

குடும்பஸ்தர் ஒருவர் தவறான முடிவெடுத்து தற்கொலை செய்துள்ள நிலையில், பிள்ளைகளுக்கு உணவு வாங்க முடியாத விரக்தியிலேயே அவர் இறந்தார் என்று மனைவி தெரிவித்துள்ளார்.

இலங்கையின் களுத்துறை, வெலிபென்ன பிரதேசத்தைச் சேர்ந்த 44 வயதுடையவரே உயிரிழந்துள்ளார். இவர் நான்கு பிள்ளைகளின் தந்தையாவார்.

இவர் தூக்கிட்டு உயிரிழந்துள்ள நிலையில், அவரது மனைவி மரண விசாணையில், பிள்ளைகளுக்கு உணவு வாங்க வழியில்லாது கணவர் விரக்தியில் இருந்தார் என்று கூறியுள்ளார்.

“3 நாள்களாக வீட்டில் உணவு எதுவுமே இல்லை. பிள்ளைகளுக்கு உணவு கொடுக்க பணம் தேடி வருகிறேன் என்று கூறிச் சென்றார். அவர் வரவில்லை. நான் வீட்டில் இருந்த நாற்காலிகளை விற்று பிள்ளைகளுக்கு உணவு கொடுத்தேன்” என்று மனைவி கூறியுள்ளார்.

உயிரிழந்தவர் கூலி வேலைக்குச் செல்பவர். நிரந்தர வீடு இல்லை. வாடகை வீட்டிலேயே குடியிருந்துள்ளனர். 12 வயதுக்குட்பட்ட 4 பிள்ளைகள் அந்த வீட்டில் உள்ளனர்.

கணவர் வீட்டுக்கு வராததால் அவருக்கு தொலைபேசி அழைப்பு எடுத்தேன். பதில் இல்லை. பின்னர் கணவர் உறவினர் வீட்டுக்கு அருகில் தூக்கிட்டு தற்கொலை செய்தார் என்று அறிந்து கொண்டேன் என மனைவி மரண விசாரணையில் கூறியுள்ளார்.