வவுனியா மாவட்டத்தில் இந்த ஆண்டு வர்த்தக நிலையங்களுக்கு எதிராக மேற்கொள்ளப்பட்ட வழக்குகளில் 16 இலட்சத்து 33 ஆயிரம் ரூபா தண்டம் அறவிடப்பட்டுள்ளது என நுகர்வோர் பாதுகாப்பு அதிகார சபையின் வவுனியா மாவட்ட பொறுப்பதிகாரி அ.லெ.ஜெஃபர் ஷாதிக் தெரிவித்தார்.
வவுனியா மாவட்டத்தில் இந்த ஆண்டு பல சுற்றி வளைப்புகளையும், சோதனை நடவடிக்கைகளையும் மேற்கொண்டிருந்தோம். கடந்த ஜனவரி மாதம் முதல் ஓகஸ்ட் மாதம் வரையான காலப் பகுதியில் 292 வழக்குகள் பதிவு செய்யப்பட்டு 16 லட்சத்து 33 ஆயிரம் ரூபா தண்டப்பணம் விதிக்கப்பட்டுள்ளது.
கடந்த மாதம் 48 வழக்குகள் பிடிக்கப்பட்டு 37 வழக்குகள் பதிவு செய்யப்பட்டன. ஒரு லட்சத்து 51 ஆயிரத்து 500 ரூபா தண்டப்பணம் விதிக்கப்பட்டுள்ளது.
காலாவதியான பொருள்களை விற்பனை செய்தமை, விலைப் பத்திரத்தை காட்சிப்படுத்தாது பொருள்களை விற்பனை செய்தமை, கட்டுப்பாட்டு விலையை மீறிப் பொருள்களை விற்பனை செய்தமை, பொருள்களை பதுக்கி வைத்திருந்தமை போன்ற பல்வேறு செயற்பாடுகளுக்கு எதிராகவே வழக்குப் பதிவு செய்யப்பட்டது.
அண்மைய காலப்பகுதியில் விலைமாற்றம் செய்து விற்பனை செய்தமை தொடர்பாக அதிக வழக்குகள் பதிவு செய்யப்பட்டன என்று அவர் மேலும் தெரிவித்தார்.
Discussion about this post