மாகாண சபை தவிசாளர்களுக்கான கொடுப்பனவுகள் குறைப்பு!!

மாகாண சபை தவிசாளர்களுக்கு வழங்கப்படும் எரிபொருள், தொலைபேசி உள்ளிட்ட கொடுப்பனவுகளை மட்டுப்படுத்துவதற்கு அரசாங்கம் தீர்மானித்துள்ளது.

இதற்கான சுற்றறிக்கை ஒன்று ஜனாதிபதி செயலாளர் சமன் ஏக்கநாயக்கவால், மாகாண ஆளுனநர்கள், மாகாண சபை செயலாளர்கள், ஆளுநரின் செயலாளர்களுக்கு அனுப்பப்பட்டுள்ளது.

இந்தச் சுற்றறிக்கையின்படி மாகாண சபை தவிசாளருக்கு ஒரேயொரு உத்தியோகபூர்வ மோட்டார் வாகனமொன்றை மாத்திரம் வழங்குவதற்குத் தீர்மானிக்கப்பட்டுள்ளது.

மோட்டார் வாகனத்துக்காக 150 லீற்றர் எரிபொருள் வழங்கப்படும் என்பதுடன், சந்தையில் நிலவும் எரிபொருள் விலைக்கேற்ப எரிபொருள் கொடுப்பனவு வழங்கப்படும்.

அலுவலக தொலைபேசி கொடுப்பனவுக்காக 5 ஆயிரம் ரூபாவும், கையடக்க தொலைபேசி கொடுப்பனவு, வதிவிட தொலைப்பேசி கொடுப்பனவு ஆகியவற்றுக்காக தலா 2 ஆயிரத்து 500 ரூபா கொடுப்பனவும் வழங்கப்படவுள்ளது.

இதுவரை மாகாண சபை தவிசாளர்களுக்கு மூன்று வாகனங்களும், அவற்றுக்கான எரிபொருளும் வழங்கப்பட்டு வந்தது.

மாகாண சபைகளின் நிர்வாக காலம் தற்போது முடிவுற்றுள்ளபோதும், மீண்டும் சபை கூடும் வரையில் மாகாண சபை தவிசாளர்கள் அதிகாரம் உடையவர்களாகக் காணப்படுவர்.