நாடாளுமன்றத்தில் நேற்று ரணில் – சஜித் சொற்போர்!

பிரதமர் ரணில் விக்கிரமசிங்கவும், எதிர்க்கட்சித் தலைவர் சஜித் பிரேமதாஸவும் நாடாளுமன்றத்தில் நேற்று வாக்குவாதத்தில் ஈடுபட்டனர்.

நாடாளுமன்றத்தில் கருத்துத் தெரிவித்த பிரதமர் ரணில் விக்கிரசிங்க, இலங்கை வரலாற்றில் மிகவும் மோசமாக எதிர்க்கட்சி இதுதான்.

ஆட்சியை எப்படி கைப்பற்றுவது எப்படி என்பது கூட அவர்களுக்கு தெரியவில்லை, என்னிடம் கற்றதை அவர்களுக்கு செயற்படுத்த தெரியவில்லை. என்னிடம் மீண்டும் வந்தால் மீண்டும் கற்றுக்கொடுப்பதற்கு தயாராக இருக்கின்றேன் என்று தெரிவித்தார்.

அப்போது குறுக்கிட்ட எதிர்க்கட்சித் தலைவர் சஜித் பிரேமதாஸ, ரணில் விக்கிரமசிங்க எனது தந்தையான ரணசிங்க பிரேமதாஸவிடம் தான் அரசியல் கற்றார் என்பதை மறந்துவிட்டார்.

இன்று அவர் எங்களுக்கு பாடம் சொல்லிக் கொடுக்க வந்துவிட்டார், ஆனால் மக்கள் அவருக்கு நல்லதொரு பாடத்தைப் புகட்டிவிட்டனர். அதனாலேயே மக்கள் அவரின் கட்சிக்கு ஒரு ஆசனத்தை கூட வழங்கவில்லை. தேசியப் பட்டியலில் வந்துவிட்டு அவர் எங்களுக்கு பாடம் புகட்டுவேன் என்று கூறுகின்றார்.

நான் அவருக்கு விரைவில் பாடமொன்றைப் புகட்டுகிறேன். அப்போது தெரியும் நாங்கள் யார் என்று. முழு நாடும் இன்று பாதாளத்துக்குள் வீழ்ந்துவிட்டது.

இப்போது எதற்கும் தீர்வு வழங்காமல் வெற்று வார்த்தைகளை மட்டும் தெரிவித்து வருகின்றார் என்று ரணிலுக்குப் பதிலடி கொடுத்தார்.