நடிகை நயன்தாராவும், இயக்குநர் விக்னேஷ் சிவனும் கிட்டத்தட்ட 8 வருடங்களாக காதலித்து வருகிறார்கள்.

இவர்கள் இருவருக்கும் ரகசிய திருமணம் நடந்துள்ளது என்று ஏற்கனவே வந்த கிசுகிசுக்களை விக்னேஷ் சிவன் மறுத்தார்.

அதே வேளையில், விக்னேஷ் சிவனுடன் தனக்கு நிச்சயதார்த்தம் முடிந்துள்ளது என்று நயன்தாரா அறிவித்தார். மேலும், இருவரும் ஒரே வீட்டில் தான் வசிக்கிறார்கள்.

இந்நிலையில், இந்த நட்சத்திர ஜோடி விரைவில் திருமணம் செய்து கொள்ளவுள்ளனர் என்றும், திருமண திகதி முடிவு செய்து விட்டனர் என்றும் தகவல் வெளியாகி உள்ளது.

நடிகர் அஜித்குமார் நடிக்கும் 62ஆவது படத்தை விக்னேஷ் சிவன் இயக்க இருக்கிறார். இதில் நயன்தாரா நாயகியாக நடிப்பார் என்று தெரிகிறது.

அதன் படப்பிடிப்பு இந்த வருடம் இறுதியில் தொடங்க இருக்கிறது. இந்த படப்பிடிப்புக்கு முன்பு திருமணம் நடக்கலாம் என்று எதிர்பார்க்கப்பட்டு வந்தது.

சமீபத்தில் வெளியாகி ஓடிக்கொண்டிருக்கும் ‘காத்துவாக்குல ரெண்டு காதல்’ பட நிகழ்ச்சியின்போது, இவர்கள் இருவருக்குமிடையே ‘காதல்’ எப்போது உருவானது என்பது பற்றி விக்னேஷ் சிவனே கூறியிருக்கிறார்.

அவர் கூறியதாவது, “நானும் ரவுடி தான் படம் முடிந்ததும், இன்னொரு செமயான படம் பண்ணிய பிறகு தான் திருமணம் செய்து கொள்ள வேண்டும் என முடிவு செய்து விட்டோம்” என்று கூறியிருந்தார்.

இந்த நிலையில் நயன்தாராவும், விக்னேஷ் சிவனும் சீரடி சாய்பாபா கோவிலுக்கு ஜோடியாக சென்று வழிபாட்டில் ஈடுபட்டனர். சீரடி கோவிலுக்கு சென்ற புகைப்படத்தை விக்னேஷ் சிவன் தனது சமூக வலைத்தள பக்கத்தில் வெளியிட்டிருந்தார்.

தற்போது நடிகை நயன்தாரா – விக்னேஷ் சிவன் திருமணம் ஜூன் 9ஆம் திகதி திருப்பதியில் நடைபெற உள்ளது என்று தகவல் வெளியாகி உள்ளது.