பொருளாதார நெருக்கடி காரணமாக இடம்பெற்ற ஆர்ப்பாட்டங்களை தொடர்ந்து ஏழு வாரங்கள் நாடு கடந்த நிலையில் வசித்த பின்னர் சிறிலங்கா திரும்பியுள்ள முன்னாள் ஜனாதிபதி கோத்தாபய ராஜபக்ச செயற்பாட்டாளர்கள் பலவந்தமாக காணாமல் ஆக்கப்பட்டமை தொடர்பில் சட்ட நடவடிக்கை எதிர்கொள்ளக்கூடும் என தகவல்கள் வெளியாகியுள்ளன.
ஜனாதிபதிக்கு இலங்கையின் அரசமைப்பு வழங்கியுள்ள விடுபாட்டுரிமை தற்போது அவருக்கு இல்லாததன் காரணமாக அவருக்கு எதிராக சட்டநடவடிக்கைகள் முன்னெடுக்கப்படலாம் என்று தெரியவருகின்றது.
தாய்லாந்திலிருந்து கடந்த வெள்ளிக்கிழமை இரவு கொழும்பு திரும்பிய கோத்தாபய ராஜபக்ச கடும் பாதுகாப்புடன் அழைத்து செல்லப்பட்டார். ஜனாதிபதி என்ற அடிப்படையில் அரசமைப்பு வழங்கிய சிறப்புரிமை காரணமாக கோத்தாபய ராஜபக்சவுக்கு எதிராக நீதிமன்ற வழக்குகள் எதுவும் இல்லை.
பாதுகாப்புச் செயலாளராக அவர் பணியாற்றியவேளை இடம்பெற்ற ஊழல் தொடர்பில் தாக்கல் செய்யப்பட்ட வழக்கும் அவர் ஜனாதிபதியான பின்னர் விலக்கிக்கொள்ளப்பட்டது.
ஆயினும் இரண்டு இளம் அரசியல் ஆர்வலர்கள் பலவந்தமாக காணாமல் ஆக்கப்பட்டமை தொடர்பில் சாட்சியமளிப்பதிலிருந்து அவருக்கு வழங்கப்பட்ட விடுபாட்டுரிமையை சவாலுக்கு உட்படுத்தி அவரை உயர்நீதிமன்றத்தில் முன்னிலையாக வேண்டும் என்ற அழைப்பாணை அனுப்பப்படும் என பாதிக்கப்பட்டவர்களின் குடும்பங்களை பிரதிநிதித்துவம் செய்யும் நுவான்போபகே தெரிவித்துள்ளார்.
கடந்த ஜூலை மாதம் அழைப்பாணை அனுப்பப்படவிருந்தவேளை கோத்தாபய நாட்டிலிருந்து தப்பியோடினார் என்றும் நுவான்போபகே தெரிவித்துள்ளார்.
இந்த காணாமல்போதல் சம்பவங்கள் 12 வருடத்துக்கு முன்னர் இலங்கையின் உள்நாட்டு போர் முடிந்த பின்னர் கோத்தாபய ராஜபக்ச நாட்டின் வலுவான பாதுகாப்பு அதிகாரியாக சகோதரர் மகிந்த ராஜபக்ச (அப்போது ஜனாதிபதி) அரசாங்கத்தின் கீழ் இருந்தபோது இடம்பெற்றன.
அந்தச் சமயம் கிளர்ச்சிக்காரர்கள் என சந்தேகிக்கப்படுபவர்கள் பத்திரிகையாளர்கள், சிவில் சமூக செயற்பாட்டாளர்கள் எனப் பலரை கடத்தி சென்ற கடத்தல் குழுவை வழிநடத்தினார் என கோத்தாபய ராஜபக்ச மீது குற்றச்சாட்டுகள் சுமத்தப்பட்டன. இவ்வாறு கடத்தப்பட்ட பலர் மீண்டும் திரும்பிவரவில்லை, ஆயினும் கோத்தாபய தான் தவறிழைத்தார் என்பதை மறுத்து வருகின்றார்.
நாடு பொருளாதார வங்குரோத்து நிலைக்குள் தள்ளப்பட்டு முன்னர் ஒருபோதும் இல்லாத வகையில் அத்தியாவசியப்பொருட்களுக்கான தட்டுப்பாட்டை எதிர்கொண்டுள்ளதால் சீற்றமடைந்த ஆயிரக்கணக்கான பொதுமக்கள் கடந்த ஜூலை மாதம் 9 ஆம் திகதி முற்றுகைப் போராட்டம் நடத்தியதைத் தொடர்ந்து ராஜபக்ச தனது உத்தியோகபூர்வ இல்லத்திலிருந்து தப்பி வெளியேறினார். சில நாள்களுக்குப் பின்னர் அவரும் அவரது மனைவியும் மெய்பாதுகாவலரும் இராணுவ விமானத்தில் மாலைதீவுக்கு தப்பிச்சென்றனர். அதன் பின்னர் சிங்கப்பூருக்கும் பின்னர் தாய்லாந்துக்கும் சென்றனர்.
Discussion about this post