ஜனாதிபதி கோத்தாபய ராஜபக்ச பதவியில் இருந்து விலக வேண்டும் என்று வலியுறுத்தி, கொழும்பிலுள்ள ஜனாதிபதி செயலகத்துக்கு முன்னால் ஆர்ப்பாட்டத்தில் ஈடுபட்ட முன்னாள் நாடாளுமன்ற உறுப்பினரும் ஐக்கிய மக்கள் சக்தியின் உறுப்பினருமான ஹிருணிகா பிரேமச்சந்திர உட்பட 11 பேர் நேற்றுக் கைது செய்யப்பட்டனர். பின்னர் அவர்கள் பொலிஸ் பிணையில் விடுவிக்கப்பட்டனர்.
நேற்று முற்பகல் ஜனாதிபதி செயலகத்தை முற்றுகையிட்டு ஹிருணிகா தலைமையில் ஆர்ப்பாட்டம் நடத்தப்பட்டது. அங்கிருந்த பொலிஸார் ஆர்ப்பாட்டத்தில் ஈடுபட்டவர்களைக் கைதுசெய்தனர்.
கைதுசெய்யப்பட்டவர்களை உடனடியாக விடுவிக்க வேண்டும் என்று வலியுறுத்தி அந்தப் பகுதியில் ஐக்கிய மக்கள் சக்தியின் நாடாளுமன்ற உறுப்பினர்கள் பலரும் ஒன்றுசேர்ந்து போராட்டத்தில் ஈடுபட்டனர்.
ஜனாதிபதி மாளிகை அமைந்துள்ள பகுதிக்குள் போராட்டக்காரர்கள் நுழைய முற்பட்டபோது, பொலிஸார் அவர்களை நோக்கி நீர்த்தாரைப் பிரயோகம் மற்றும் கண்ணீர்ப் புகைத் தாக்குதலை நடத்தினர். அதனால் அந்தப் பகுதியில் பதற்றமான நிலைமை நிலவியது.
பொலிஸாரின் கண்ணீர்ப் புகைத் தாக்குதலால் அந்தப் பகுதியில் வீதியில் செல்லும் வாகனங்களில் பயணிப்போர் பெரும் அசௌகரியங்களுக்கு உள்ளாகினர்.
கைதுசெய்யப்பட்ட ஹிருணிகா உள்ளிட்ட 11 பேரும் பொலிஸ் பிணையில் விடுவிக்கப்பட்டதையடுத்து ஜனாதிபதி செயலகத்தை முற்றுகையிட்டிருந்த போராட்டக்காரர்கள் கலைந்து சென்றனர்.
இதேவேளை, ஹிருணிகா பிரேமச்சந்திர குழுவினர் கைதுசெய்யப்பட்டதும் இலங்கை சட்டத்தரணிகள் சங்கம் உடனடியாக அவர்களுக்குத் தேவையான சட்ட உதவிகளை வழங்க முன்வந்தது.
எதிர்க்கட்சித் தலைவர் சஜித் பிரேமதாஸ, ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டார ஆகியோர் சட்டத்தரணிகளுடன் நேரடியாகப் பொலிஸ் நிலையத்துக்குச் சென்று தேவையான சட்ட உதவிகளை மேற்கொண்டனர்.
அதேவேளை, தற்போதைய அரசாங்கம் மற்றும் ஜனாதிபதிக்கு எதிராக கொழும்பில் வேறு சில இடங்களிலும் நேற்றுப் போராட்டங்கள் முன்னெடுக்கப்பட்டன. நாடாளுமன்றத்துக்கு அருகிலும் எதிர்ப்புப் போராட்டங்கள் முன்னெடுக்கப்பட்டன.
Discussion about this post