எகிறிச் செல்கிறது இலங்கையின் கடன்!!- அதிர்ச்சித் தகவல்!!

கடந்த ஆண்டு டிசெம்பர் மாதம் 31ஆம் திகதி வரையான காலப்பகுதியில் இலங்கை அரசாங்கம் 9 ஆயிரத்து 700 கோடி அமெரிக்க டொலர் கடன் சுமையில் உள்ளது என்று தெரிவிக்கப்படுகின்றது.

இலங்கையின் உள்நாட்டு மற்றும் வெளிநாட்டு கடன்களை கணக்காய்வு செய்வதற்காக இலங்கை மத்திய வங்கியால் நியமிக்கப்பட்ட சர்வதேச நிதி ஆலோசனை நிறுவனமான பிரான்ஸின் லெசார்ட்ஸ் வழங்கிய விசேட அறிக்கையிலேயே இவ்வாறு தெரிவிக்கப்பட்டுள்ளது.

இந்த கடன்கள் இலங்கையின் கடனை மறுசீரமைப்பதற்கும், நாட்டின் கடன் சுமை தொடர்பாக சர்வதேச நாணய நிதியத்துக்கு அறிக்கை செய்வதற்கும் கணக்காய்வு செய்யப்பட்டது.

கணக்காய்வு அறிக்கையின்படி, கடந்த வருடம் டிசெம்பர் மாதம் 31ஆம் திகதிக்குள் இலங்கை 4 ஆயிரத்து 700 கோடி அமெரிக்க டொலர் (47 பில்லியன்) வெளிநாட்டுக் கடனுக்கு உள்ளாகியுள்ளது என்று தெரிவிக்கப்படுகிறது.

பின்னர் 5 ஆயிரம் டொலர் (50 பில்லியன்) உள்நாட்டு கடனுக்கு உட்பட்டது. தற்போது 50 பில்லியன் டொலர் கடன் தொகை மேலும் அதிகரித்துள்ளது என்று கூறப்படுகிறது.

கடந்த வருடம் டிசெம்பர் மாதம் 31ஆம் திகதி வரை கடனை கணக்காய்வு செய்தபோது ஒரு டொலரின் மதிப்பு சுமார் 203 ரூபாயாகும்.

தற்போது டொலர் ஒன்றின் பெறுமதி 355 இலங்கை ரூபாவாக அதிகரித்துள்ளதால் கடன் சுமை மேலும் ஒன்றரை மடங்கு அதிகரித்துள்ளது என்று தெரியவருகின்றது.