உணவுப் பாதுகாப்பை உறுதி செய்யவும், மக்களின் போசணை மட்டத்தை மேம்படுத்தவும் மத வழிபாட்டுத் தலங்களை மையமாகக் கொண்ட உணவு வங்கிகள் மற்றும் உணவுப் பரிமாற்ற மையங்களை நிறுவ முடிவு செய்யப்பட்டுள்ளது.
உணவுப் பாதுகாப்பை உறுதி செய்தல் மற்றும் மக்களின் போசணை மட்டத்தை மேம்படுத்துதல் திட்டத்தின் முன்னேற்ற மீளாய்வுக் கலந்துரையாடல், நேற்றுமுன்தினம் உணவுப் பாதுகாப்பு தொடர்பான ஜனாதிபதியின் ஆலோசகர் கலாநிதி சுரேன் படகொட தலைமையில் நடைபெற்றது.
சமய ஸ்தலங்களை மையமாகக் கொண்டு இந்த வேலைத் திட்டத்தை மாவட்ட செயலகம் மற்றும் பிரதேச செயலகங்களுக்கூடாக 14 ஆயிரத்து 22 கிராம சேவகர் பிரிவுகளிலும் புத்தசாசன மற்றும் சமய விவகார அமைச்சு ஊடாக நடைமுறைப்படுத்துவதற்கு தீர்மானிக்கப்பட்டுள்ளது.
பிரதேசத்தில் ஆரம்பிக்கப்படும் உணவு பரிமாற்ற மையமானது, அந்தப் பிரதேசத்தில் கிடைக்கக்கூடிய தேவைக்கு அதிகமான உணவுகளை சேகரித்து உணவு வங்கிக்கு வழங்கும். பின்னர் அந்த உணவு, உணவு வங்கியூடாக உணவு பற்றாக்குறையுடைய குடும்பங்களுக்கு விநியோகிக்கப்படும்.
இந்தச் செயற்பாட்டின் மூலம் தேவைக்கதிகமாக உள்ள உணவை பிரதேச வாசிகளிடையே மட்டுமன்றி ஏனைய பிரதேசங்களில் உள்ளவர்களிடையேயும் பகிர்ந்தளிக்க முடியும் என்பதால் உணவு வீண் விரயம் செய்யப்படுவதை தடுக்க முடியும் என்று தெரிவிக்கப்படுகின்றது.
Discussion about this post