அரச ஊழியர்களின் கட்டாய ஓய்வுக்கான சுற்றறிக்கை வெளியானது

அரச உத்தியோகத்தர்களின் கட்டாய ஓய்வு வயதெல்லை 60 ஆகக் குறைக்கப்பட்டுப் பொது நிர்வாக அமைச்சால் சுற்றறிக்கை வெளியிடப்பட்டுள்ளது.

அரச உத்தியோகத்தர்களின் கட்டாய ஓய்வு வயதை 60 ஆகக் குறைப்பதற்கு நிதியமைச்சரால் 2021 ஆம் ஆண்டின் 30 ஆம் இலக்க ஒதுக்கீட்டுச் சட்டத்தை திருத்துவதற்காக கடந்த ஒகஸ்ட் மாதம் 30 ஆம் திகதி சமர்ப்பிக்கப்பட்ட இடைக்கால பாதீட்டில் முன்மொழியப்பட்டிருந்தது.

அதற்கு நாடாளுமன்றம் அங்கீகாரம் வழங்கியிருந்த நிலையில், ஓய்வூதிய பிரமாணக் குறிப்பில் தேவையான திருத்தங்களைச் செய்வதற்கும் அனுமதி வழங்கப்பட்டிருந்தது.

இதற்கமைய, கடந்த ஜனவரி மாதம் 6 ஆம் திகதி வெளியிப்பட்ட பொது நிர்வாகச் சுற்றறிக்கை எதிர்வரும் டிசெம்பர் மாதம் 31 ஆம் திகதிக்குப் பின்னர் இரத்துச் செய்யப்படவுள்ளது.

கட்டாய ஓய்வு வயதானது, அரசமைப்பின் மூலம், நீதித்துறை சட்டத்தின் மூலம் அல்லது நிர்ணயிக்கப்பட்டுள்ள நீதிச் சேவை உத்தியோகத்தர்களைத் தவிர்ந்த ஏனைய அனைத்து அரச உத்தியோகத்தர்களுக்கும் பொருந்தும்.

அடுத்த வருடம் ஜனவரி முதலாம் திகதி முதல் நடைமுறையாகும் வகையில் அனைத்து அரச உத்தியோகத்தர்களின் கட்டாய ஓய்வு வயதை 60 ஆக கருதிச் செயற்படுதல், 60 வயதுக்கு மேல் தற்போது சேவையில் ஈடுபட்டுள்ள மற்றும் டிசெம்பர் 31ஆம் திகதி அல்லது அதற்கு முன்னர் 60 வயது பூர்த்தியாகும் அரச உத்தியோகத்தர்கள் அவர்களின் விருப்பத்தின்படி அந்தத் திகதிக்கு முன்னர் ஓய்வு பெற முடியும்.

அவ்வாறு ஓய்வுபெறவுள்ள அனைத்து உத்தியோகத்தர்களும், உரிய நடைமுறைப்படி, தங்களது ஓய்வுபெறும் விண்ணப்பங்களை, உரிய நியமன அதிகாரியிடம் அனுமதி பெற்று, அதை ஓய்வூதியப் பணிப்பாளர் நாயகத்திடம் சமர்ப்பிக்க வேண்டும் என்று அறிவிக்கப்பட்டுள்ளது.