மாணவியின் அந்தரங்க படங்களை வைத்து மிரட்டிய இளைஞர்கள் கைது!! – ஊர்காவற்றுறையில் சம்பவம்!!

முன்னாள் காதலனுக்கு அனுப்பிய புகைப்படங்களை வைத்து பாடசாலை மாணவி ஒருவருக்குப் பாலியல் தொல்லை கொடுத்த குற்றச்சாட்டில் இருவர் கைது செய்யப்பட்டுள்ளனர் என்று ஊர்காவற்றுறைப் பொலிஸார் தெரிவித்தனர்.

கைது செய்யப்பட்ட இளைஞர்கள் இருவரும் புகுங்குடுதீவைச் செர்ந்தவர்கள் என்று தெரிவித்த ஊர்காவற்றுறைப் பொலிஸார், இன்னும் இரு இளைஞர்கள் தேடப்பட்டு வருகின்றனர் என்றும் தெரிவித்தனர்.

17 வயதான மாணவி, இளைஞர் ஒருவரைக் காதலித்தபோது அந்தரங்க புகைப்படங்களை பரிமாறிக் கொண்டுள்ளனர்.

தற்போது அவர்களின் காதல் முறிவடைந்த நிலையில், முன்னாள் காதலன் அந்தப் புகைப்படங்களை தனது நண்பர்களுக்குக் கொடுத்து, மாணவியை பாலியல் தொந்தரவுக்கு உட்படுத்த முயன்றுள்ளார் என்று கூறப்படுகின்றது.

மாணவி பொலிஸ் நிலையில் பதிவு செய்த முறைப்பாட்டுக்கு அமைய பொலிஸார் விசாரணைகளை ஆரம்பித்திருந்தனர்.

விசாரணைகளின் அடிப்படையில் இருவர் கைது செய்யப்பட்டுள்ளனர் என்று தெரிவித்த பொலிஸார் அவர்கள் பொலிஸ் காவலில் வைத்து விசாரணைக்குட்படுத்தப்பட்டு வருகின்றனர் என்றும் தெரிவித்தனர்.