வவுனியா கணேசபுரம் 8 ஆம் ஒழுங்கைப் பகுதியில் கிணற்றிலிருந்து நேற்று இரவு 7.30 மணியளவில் சிறுமியின் சடலம் மீட்கப்பட்டதையடுத்து அங்கு பதற்றமான சூழ்நிலை நிலவியது.
16 வயதுடைய ராசேந்திரன் யதுசி என்ற சிறுமி தாய், தந்தையை இழந்த நிலையில் மாமனாரின் அரவணைப்பில் வசித்து வந்துள்ளார். நேற்று மதியம் தனியார் கல்வி நிலையம் சென்ற நிலையில் மாலை 5.30 மணி வரை வீடு திரும்பவில்லை.
சிறுமியைத் தேடிய உறவினர்கள் அவரைக் கண்டுபிடிக்க முடியாததால் நெளுக்குளம் பொலிஸில் முறைப்பாடு செய்தனர். நெளுக்குளம் பொலிஸார் உறவினர்கள் மற்றும் அயலவர்கள் துணையுடன் சிறுமியை தேடும் நடவடிக்கையை முன்னெடுத்தனர்.
அந்தப் பகுதியிலுள்ள ஆள் நடமாட்டம் அற்ற பகுதி ஒன்றில் உள்ள கிணற்றில் இரவு 7.30 மணியளவில் குறித்த சிறுமி சடலமாக கண்டு பிடிக்கப்பட்டார். சம்பவ இடத்துக்குச் சென்ற தடயவியல் பொலிஸார் மற்றும் இராணுவத்தினா் மோப்ப நாயின் உதவியுடன் விசாரணைகளை முன்னெடுத்தனர்.
கிணற்றிலிருந்து 50 மீற்றர் தூரத்திலுள்ள மரத்தின் கீழ்ப்பகுதியில் சிறுமியின் காலணி மற்றும் புத்தகங்கள் மீட்கபட்டதுடன் மோப்ப நாய் கிணறு அமைந்துள்ள பகுதியிலிருந்து 100 மீற்றர் தூரத்திலுள்ள காணியில் அமைந்துள்ள வர்த்தக நிலையத்தில் தஞ்சமடைந்திருந்தது. அந்த பாவனையற்ற வர்த்தக நிலையத்தில் மதுபான போத்தல்களுடன் கயிறும் காணப்பட்டது.
சிறுமியின் மரண விசாரணைகளின் பின்னரே மரணத்துக்கான காரணம் தொடர்பில் தெரிவிக்க முடியும் என பொலிஸார் தெரிவித்தமையுடன் மேலதிக விசாரணைகளை நெளுக்குளம் பொலிஸாருடன் இணைந்து தடயவியல் பொலிஸர் முன்னெடுத்துள்ளனர்.
Discussion about this post