ரஷ்யாவின் பெரும் கப்பலைத் தாக்கி அழித்த உக்ரைன்!! – வலுக்கின்றது போர்!!

உக்ரைன் துறைமுகத்தை முற்றுகையிட்ட ரஷ்ய கடற்படைக் கப்பல் தாக்கி அழிக்கப்பட்டுள்ளது என்று உக்ரைன் கடற்படை அறிவித்துள்ளது.

உக்ரைன் மீது கடந்த ஒரு மாதத்துக்கும் மேலாக ரஷ்யா தாக்குதல் நடத்தி வருகின்றது. உக்ரைனும் கடுமையாகப் பதில் தாக்குதல்களை நடத்துகின்றது.

உக்ரைனின் மரியபோல் துறைமுக நகர் அருகே அஸோவ் கடலில் நிறுத்தப்பட்டிருந்த ரஷ்யக் கடற்படைக் கப்பலே அழிக்கப்பட்டுள்ளது என்று உக்ரைன் தெரிவித்துள்ளது.

இது தொடர்பாக உக்ரைன் கடற்படை விடுத்துள்ள தகவலில், ரஷ்யாவின் கட்டுப்பாட்டில் இருக்கும் பெர்டியான்ஸ்க் துறைமுகத்தில் நிறுத்தப்பட்டிருந்த ரஷ்யாவின் மிகப்பெரிய கப்பல் தாக்கி அழிக்கப்பட்டிருக்கின்றது என்று குறிப்பிடப்பட்டுள்ளது.

துறைமுகத்தில் இருந்து பெரும் கரும்புகை எழுந்தவண்ணம் இருக்கின்றது என்று சர்வதேச ஊடகங்கள் செய்தி வெளியிட்டுள்ளன. துறைமுகத்தில் ரஷ்யக் கப்பல் தீப்பற்றி எரியும் காட்சிகளும் வெளியாகியுள்ளன.

இது தொடர்பில் ரஷ்யத் தரப்பில் இருந்து இதுவரை எதுவித அறிவிப்புக்களும் வெளியாகவில்லை.