யாழ்ப்பாணம், புத்தூரில் மின்சாரம் தாக்கி கணவரும், மனைவியும் உயிரிழந்துள்ளனர். இந்தச் சம்பவம் இன்று மதியம் நடந்துள்ளது.
மின்சாரத்தால் தாக்கப்பட்ட மனைவியைக் காப்பாற்ற முயன்றபோது, கணவர் மின் தாக்கத்துக்கு இலக்காகியுள்ளார்.
59 வயதான குகப்பிரகாரம் மற்றும் அவரது மனைவியான 55 வயதான சுகுணா ஆகியோரே உயிரிழந்துள்ளனர்.
இவர்களின் மகன் வேலைக்குச் சென்றிருந்த நிலையில், மகள் யாழ்ப்பாணம் பல்கலைக் கழகத்துக்கு கற்றலுக்குச் சென்றிருந்தார்.
மாலை வீடு வந்தபோது பெற்றோரைக் காணாத நிலையில், தண்ணீர் தொட்டி அருகே இருவரும் சடலங்களாகக் காணப்பட்டுள்ளனர்.
நீர் இறைக்கும் மோட்டாருக்கான வயரில் மின் ஒழுக்கு ஏற்பட்டு, தண்ணீர் தொட்டியில் தொடுகையில் இருந்த வாழை இலை ஊடக நீரில் மின் பாய்ந்துள்ளது. தண்ணீர் அள்ள முயன்றபோது மனைவியும், கணவரும் மின்தாக்கத்துக்கு இலக்காகியிருக்கலாம் என்று நம்பப்படுகின்றது.
இந்தச் சம்பவம் தொடர்பாக அச்சுவேலிப் பொலிஸார் விசாரணைகளை முன்னெடுத்துள்ளனர்.
Discussion about this post