மன்னாரில் யானை தாக்கிப் படுகாயமடைந்த குடும்பப் பெண் ஒருவர் சிகிச்சை பயனின்றி உயிரிழந்துள்ளார்.
முருங்கன், அடம்பனைச் சேர்ந்த சதானந்தன் சுதா (வயது-46) என்பவரே உயிரிழந்துள்ளார். இவர் 3 பிள்ளைகளின் தாயாவார்.
கடந்த 13 ஆம் திகதி அதிகாலை வீட்டு வளாகத்துக்குள் புகுந்த யானை இவரைத் தாக்கியது. அதிகாலை ஒரு மணியளவில் இந்தச் சம்பவம் நடந்துள்ளது.
சத்தம் கேட்டு வெளியே வந்த குடும்பத் தலைவரும், அவரது மனைவியும் ரோச் லைட் அடித்துப் பார்த்துள்ளனர். அங்கு நின்ற யானை இருவரையும் தாக்க முயன்றுள்ளது. கணவர் ஓடித் தப்பி வீட்டுக்குள் புகுந்துள்ளார்.
வீட்டுக்கு வெளியே மனைவி மறைய முற்பட்டுள்ளார். யானை வீட்டுக்கு வெளியே இருந்த மனைவியையும், அங்கிருந்த மரங்களையும் தாக்கிவிட்டு அங்கிருந்து சென்றுள்ளது.
யானையின் தாக்குதலில் படுகாயமடைந்த பெண் மன்னார் மருத்துவமனையில் சேர்க்கப்பட்டு, அங்கிருந்து மேலதிக சிகிச்சைக்காக யாழ்ப்பாணம் போதனா மருத்துவமனைக்கு மாற்றப்பட்டார்.
அவருக்குச் சிகிச்சைகள் வழங்கப்பட்டபோதும் சிகிச்சை பயனின்றி நேற்று முற்பகல் 9 மணியளவில் அவர்உ யிரிழந்துள்ளார்.
இறப்பு விசாரணைகளை யாழ்ப்பாணம் போதனா மருத்துவமனை இறப்பு விசாரணை அதிகாரி ந.பிறேமகுமார் மேற்கொண்டார்.
Discussion about this post