இடைக்கால அரசாங்கத்துக்கு இடமளித்து அரசாங்கம் பதவி விலக வேண்டும் அல்லது அரசாங்கம் மற்றும் எதிர்க்கட்சி நாடாளுமன்ற உறுப்பினர்கள் இடைக்கால அரசாங்கத்துக்கு தயாராக இல்லை என்றால் நாடாளுமன்ற தேர்தலுக்கு செல்ல வேண்டும் என முன்னாள் ஜனாதிபதி சந்திரிக்கா பண்டாரநாயக்க குமாரதுங்க தெரிவித்துள்ளார்.
அவர் விடுத்துள்ள அறிக்கை ஒன்றிலேயே இவ்வாறு தெரிவித்துள்ளார்.
மக்கள் ஆணை இருக்கும் வரை மக்கள் பிரதிநிதிகள் ஆட்சியில் இருக்க முடியும். மக்கள் நிராகரித்தால் அவர்கள் விரைவில் அதிகாரத்தை கைவிட தயாராக இருக்க வேண்டும்.
மக்கள் தங்கள் அபிலாஷைகளை நிறைவேற்றுவதற்காகவே மக்கள் பிரதிநிதிகளுக்கு அதிகாரம் வழங்குகிறார்கள். மக்கள் கொடுக்கும் அதிகாரம் வாழ்நாள் முழுவதும் அல்ல தற்காலிகமானது என்பதை அவர்கள் உணர வேண்டும்.
மகாசங்கத்தினர், சிவில் சமூகம் மற்றும் பொதுமக்கள் உட்பட அனைத்து மதத் தலைவர்களின் பலத்த அழுத்தங்களுக்கு செவிசாய்க்காமல் தொடர்ந்தும் அதிகாரத்தில் இருப்பதற்கான அரசாங்கத்தின் நடவடிக்கையை வன்மையாகக் கண்டிக்கின்றேன்.
இந்த நேரத்தில் அரசாங்கத்திற்கு இரண்டு வழிகள் மட்டுமே உள்ளன.
முதலாவது ஜனாதிபதி மற்றும் அரசாங்கம் பதவி விலகி, இடைக்கால அரசாங்கத்தின் மூலம் உள்நாட்டு பொருளாதாரத்தை வலுப்படுத்தி நாட்டில் நிலையான நிர்வாகத்தை உருவாக்குவது.
இரண்டாவது, அரசாங்க மற்றும் எதிர்க்கட்சி நாடாளுமுன்ற உறுப்பினர்கள் அதற்கு தயாராக இல்லை என்றால் தேர்தல் மூலம் நிலையான அரசாங்கத்தை அமைப்பது.
இறுதியாக, அனைத்து நாடாளுமன்ற உறுப்பினர்களும் நேர்மையாக மக்களுக்காக நிற்க வேண்டும். அவர்களின் அபிலாஷைகளை பிரதிநிதித்துவப்படுத்த முடியாவிட்டால் அவர்கள் பதவி விலக வேண்டும் என்று அவர் தெரிவித்துள்ளார்.
Discussion about this post