சமையல் எரிவாயு சிலிண்டர் வழங்கக் கோரி யாழ்ப்பாணத்தில் இன்று மக்கள் போராட்டத்தில் ஈடுபட்டனர்.
வீதியை மறித்து மக்கள் போராட்டம் நடத்தியதை அடுத்து, கோப்பாய் பொலிஸார் சம்பவ இடத்துக்கு வந்து நிலைமையைக் கட்டுப்படுத்தினர்.
யாழ்ப்பாணம், பரமேஸ்வராச் சந்தியில் உள்ள லிட்ரோ முகவர் நிலையத்தில் எரிவாயு சிலிண்டர்கள் விநியோகிக்கப்படுகின்றன என்று கூறப்பட்டபோதும், அங்கு விநியோகம் நடைபெறவில்லை.
கடந்த சில நாள்களாக தினமும் சிலிண்டருடன் சென்று ஏமாற்றமடைந்த மக்கள் இன்று போராட்டத்தில் ஈடுபட்டனர். முகவர் நிலையத்தில் எரிவாயு சிலிண்டர்கள் பதுக்கப்பட்டுள்ளன என்று மக்கள் குற்றஞ்சாட்டினர்.
சம்பவ இடத்துக்கு வந்த கோப்பாய் பொலிஸார் மக்களுடன் கலந்துரையாடியதுடன், முகவர் நிலையத்தைச் சோதனையிட்டபோது அங்கு எரிவாயு சிலிண்டர்கள் இருக்கவில்லை என்று கூறப்படுகின்றது.
எரிவாயு சிலிண்டர் பதுக்கப்பட்டால் உரிய நடவடிக்கை எடுக்கப்படும் என்றும், பொலிஸார் தலையிட்டு விநியோகிப்பர் என்றும் உறுதி மொழி வழங்கப்பட்டதை அடுத்து மக்கள் போராட்டத்தைக் கைவிட்டனர்.
Discussion about this post